بحبها بحلوها ومرها.......بلدي

فتحت عينى على الدنيا لقيت نفسى فى أم الدنيا.. انكتب فى شهادة ميلادى مصرية، أبويا مصرى وأمى مصرية.

إحنا المصريين اتولدنا وإحنا شايلين جنسيتنا وسام على صدرنا.. لأننا مصريون.. كِبرنا فيها.. عشنا مع أهلنا وأحبابنا وأصحابنا فيها.. حتى لو فى حد فيكم متولدش فى مصر وعاش حياته فى بلد تانية – هو فى الآخر مصرى – هيلف يلف ويرجع تانى لبلده.

تعبنا فيها وعشنا همومنا وكمان أفراحنا فيها.. بنكبر وأحلامنا بتكبر معانا وإحنا فيها، حتى لو كنا بعيدين عنها – مصر فى قلبنا – منين رحنا و منين جينا هى فى قلبنا.

مهما حصل فيها.. بلدك هى وطنك، ووطنك هو اختيار ربنا – سبحانه وتعالى – ليك. مهما تعبت فيها هتفضل تحبها وهتفضل دايماً عايزها أحسن بلد فى الدنيا.. مهما اتغربت عنها هتفضل دايماً حاسس بالحنين ليها.

وسط كل اللى بيحصل فيها.. بحبها.. بحبها بحلوها ومُرها.. بلدى